- 740 -

1449. April 7.

Vnsern vrundlichin grus zcuuor. Liebin herren vnd vrunde. Als vnd wie denne ewer ersamkeyt gestern von warnunge wegen schrebin, doruff ir begert ab wir icht ernstes salchir zachin irfuren, euch ane botschaft nicht zcu lassen, also lossen wir euch wissen, daz vns dy erbarn von Lewenberg nochtin am obinde des gleich fleissig warnende geschrebin habin, der brieff hirynne vorslossen wir ewer liebe mete senden, dorynne ir wol vornemen wert, wy sich dy ding anlossen welden, betin wir ewer vorsichtikeyt mit ganczem fleissigem dinste, dy zachen in gedenglicher achtunge zcu tragin als is not wurde tuen, vns mit vnsern gnedigen frawen gnaden vnd ewer beystendige hulffe zcu sterken vnd nicht zcu lossen, zo wir yo, ab got wil, auch wackrig seyen wollen vnd das beste mit furschunge vnd zcusehen tun vnd bestellen wellen. Gegebin am montage noch Palmarum im XLIXten jare.
Ratmanne zum Goltberge.

Mit Rückaufschrift an den liegnitzer Rath.

Orig. Kgl. Bibl z. Berl Ms. Boruss. f. 568. No. 106.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866